trout

  Journal » Trout 16 » Wea Pidgin Lives [Ann Inoshita]
   «       62       63       64       65       66    67    68       69       70       71       »   

 

Wea Pidgin Lives

Ann Inoshita


Da teacha stay writing on da chalkboard,
so she neva notice one Pidgin fly in da classroom.
I neva seen one Pidgin in class befo.
Da teacha heard um and turned around.
She told da class dat Pidgin no belong hea.

She try shoo um out but da Pidgin flew
by da desks, da windows, da walls.
Was hard fo catch um cuz da Pidgin move fast
and neva like go away.

Da bugga stay trapped inside.
Da Pidgin made big noise, and she got mo mad.
I asked da teacha why Pidgin no can be in da classroom.
Den she got mad at me and told me I no undastand
dat she teaching us da right way fo do everyting.

I was going talk some mo but she neva like listen.
Took long time but she finally cornered da Pidgin
and grabbed um. She took um out da door and set um free.

Pidgin no stay in da classroom,
but I can still hear um outside.

 


 « contents » 
© Copyright 2010 Ann Inoshita & Trout.